ВІЦЕБСК, 14 ліп — Sputnik, Яўген Казарцаў. Мноства гасцей з розных краін свету сабраліся ў Віцебску напярэдадні афіцыйнага адкрыцця фестывалю "Славянскі базар", перадае карэспандэнт Sputnik са сталіцы музычнага форуму.
Гэты "Славянскі базар" — юбілейны, 25 па ліку. Інфармацыйную падтрымку фестываля ажыццяўляе Sputnik Беларусь.
У дзень афіцыйнага адкрыцця Віцебск поўны людзей. Мясцовыя жыхары і госці горада, не гледзячы на працоўны дзень, запоўнілі цэнтр горада. Пашанцавала і з надвор'ем: у небе над Віцебскам усяго некалькі аблокаў, а сіноптыкі абяцаюць адсутнасць ападкаў.
"У папярэднія гады на плошчы Свабоды было вальней, а сёлета больш і людзей, і намётаў. Гэтым разам асабліва адчуваецца свята! Асабліва мне спадабалася, што на плошчы пякуць бліны па сучасных тэхналогіях", — дзеліцца ўражаннямі пастаянная госця фестывалю Алена.
Госці "Славянскага базару" селяцца хто ў знаёмых (тыя, каму пашанцавала з такiмi ў Віцебску), хто — у гасцініцах горада, для якіх час фестывалю па праву можна назваць самым прыбытковым.
"Гасцей ужо шмат, а новыя ўсё прыязджаюць. У нас наогул селяцца беларусы, рускія і латышы. У іншых гасцініцах і з іншых краін", — падзяліліся са Sputnik у гасцініцы "Дзвіна".
Па настроі і мясцовых жыхароў, і гасцей фестывалю зразумела: "Славянскі базар" — свята не толькі для Віцебска. Афіцыйнае адкрыццё фестывалю адбудзецца ўвечары, з прыветным словам на ім выступіць прэзідэнт Беларусі Аляксандр Лукашэнка.
