МІНСК, 20 ліп — Sputnik. Прэзідэнт Беларусі Аляксандр Лукашэнка плануе здзейсніць візіт у Кітай сёлета ў верасні і правесці перамовы з кітайскім кіраўніцтвам на вышэйшым узроўні па шырокаму колу пытанняў.
У сераду кіраўнік дзяржавы прыняў прэзідэнта карпарацыі Citic Group, якая ажыццяўляе будаўніцтва завода па вытворчасці легкавых аўтамабіляў Geely пад Барысавам у Мінскай вобласці, а таксама вядзе мадэрнізацыю Аршанскага ільнокамбіната і рэалізуе шэраг іншых праектаў у Беларусі.
"У бліжэйшы час, хутчэй за ўсё ў верасні, мы правядзем перамовы на вышэйшым узроўні ў Пекіне з маім калегам Сі Цзіньпінам. У нас шырокая павестка дня, шмат пытанняў трэба будзе ўзгадніць і вырашыць", — сказаў Лукашэнка, прымаючы кіраўніка карпарацыі Ван Цзюня ў сераду ў Мінску.
Паводле слоў прэзідэнта, у Беларусі разлічваюць, што да гэтага візіту беларускія міністэрствы і ведамствы, а таксама прадпрыемствы правядуць перамовы з Кітайскай Citic Group і знойдуць не толькі агульныя падыходы, але і падрыхтуюць праекты дакументаў па рэалізацыі маштабных праектаў у дзвюх краінах.
Лукашэнка дадаў, што, не гледзячы на некаторы пратакольны характар сённяшняй сустрэчы, беларускі бок рады быў бы абмеркаваць са сваімі кітайскімі партнёрамі ўвесь спектр пытанняў і праблем, калі яны існуюць, "каб не было потым пытанняў і недагаворак".
Са свайго боку Ван Цзюнь распавёў, што пасля прыбыцця ў Беларусь ён адразу ж наведаў пляцоўку будаўніцтва завода "БелДжы" і пабываў на Аршанскім ільнокамбінаце. Тут ён пераканаўся, што ўсе работы выконваюцца паспяхова.
"Здамо праект "БелДжы" у канцы гэтага года, а Аршанскі ільнокамбінат — да канца першага паўгоддзя наступнага года", — дадаў Ван Цзюнь.
