МІНСК, 26 ліп — Sputnik. Прэзідэнт Беларусі Аляксандр Лукашэнка падпісаў прыняты Палатай прадстаўнікоў і адобраны Саветам Рэспублікі Нацыянальнага сходу Кодэкс Рэспублікі Беларусь аб культуры, паведамілі Sputnik у прэс-службе кіраўніка дзяржавы.
Кодэкс заснаваны на законах аб культуры, аб бібліятэчнай справе, аб народным мастацтве і народных промыслах, пра творчыя саюзы і творчых работнікаў, аб кінематаграфіі, аб музеях і аб ахове гісторыка-культурнай спадчыны, якія дзейнічаюць у цяперашні час.
"Кодэкс аб культуры распрацаваны ўпершыню і не мае аналагаў на постсавецкай прасторы. Кодэксам прадугледжваецца стварэнне на базе існуючых прававых інстытутаў адзінага механізму рэгулявання адносін у сферы культуры і адначасовая ліквідацыя наяўных недахопаў прававога рэгулявання ў гэтай сферы, забяспечваецца скарачэнне прававых актаў па пытаннях культуры і іх упарадкаванні", — растлумачылі ў прэс-службе.
У мэтах захавання культурных каштоўнасцяў, развіцця арганізацый культуры і забеспячэння агульнадаступнасці культурных дасягненняў Кодэксам ўсталёўваюцца прававыя, арганізацыйныя, эканамічныя і сацыяльныя асновы культурнай дзейнасці і рэгулююцца праваадносіны ў наступных сферах:
- захаванне і развіццё культурных каштоўнасцяў, ахова гісторыка-культурнай і археалагічнай спадчыны;
- бібліятэчная і музейная справа;
- кінематаграфічная дзейнасць;
- народныя мастацкія рамёствы, дзейнасць калектываў мастацкай самадзейнасці; правядзенне культурных мерапрыемстваў,
- арганізацыя культурнага адпачынку насельніцтва;
- заахвочванні ў сферы культуры.
Кодэкс уступіць у сілу праз шэсць месяцаў пасля яго афіцыйнага апублікавання. На сённяшні дзень на Нацыянальным прававым інтэрнэт-партале дакумент не апублікаваны.
