МІНСК, 27 ліп — Sputnik. Пытанне аб прысваенні Нацыянальнаму аэрапорту Мінска імя першадрукара Францыска Скарыны вырашыцца да канца года, паведаміў журналістам у сераду міністр культуры Беларусі Барыс Святлоў.
Першым пытанне аб прысваенні аэрапорту імя Скарыны ўздымаў гендырэктар Нацыянальнага мастацкага музея Уладзімір Пракапцоў, пазней гэтую ініцыятыву падтрымалі многія дзеячы культуры і шараговыя беларусы. Як распавёў кіраўнік Мінкульта, у гонар Года культуры ведамства не хоча абмяжоўвацца перайменаваннем аэрапорта. Таксама ў планах — прысвоіць самалётам імёны вядомых беларускіх дзеячаў культуры.
"З гэтай прапановай мы ўжо звярнуліся ў "Белавія". Канкурэнты ў нас у гэтай справе — Мінспорту, яны таксама хацелі б пэўныя імёны на самалётах… Але ўсё скончыцца мірна", — паабяцаў Святлоў.
Таксама міністр падкрэсліў, што да канца года ўсе пытанні ўжо будуць вырашаны — і з перайменаваннем аэрапорта, і з назвамі для самалётаў. "Да канца года ўсё павінна вырашыцца", — сказаў кіраўнік ведамства.
Міністр не ўдакладніў, ці будзе называцца аэрапорт "імя Скарыны", або паводле еўрапейскай традыцыі — "аэрапорт Скарына", як аэрапорт Шарль Дэ Голь, аэрапорт Кэнэдзі і гэтак далей.
У сярэдзіне жніўня "Белавія" прадставіць публіцы і свой новы брэнд — яго пакуль трымаюць у таямніцы.
