МІНСК, 29 ліп — Sputnik. Нацыянальны аэрапорт Мінск прыняў першы ў гісторыі "Белавія" брэндаваны боінг авіякампаніі. Карэспандэнты Sputnik сустракалі размаляваны лайнер на ўзлётнай паласе.
Прэзентацыя пачалася пазней запланаванага часу — самалёт затрымаўся на 45 хвілін. Аднак прадстаўнікі кампаніі Wargaming у гутарцы з карэспандэнтам Sputnik адзначылі, што дзень для прэзентацыі абраны ўдалы — у такое надвор'е самалёт будзе вельмі добра бачны скрозь аб'ектывы журналісцкіх камер.
"Гэта ж не звычайны рэйс, у дадзеным выпадку можна дапусціць і затрымку", — адказаў намеснік дырэктара кампаніі "Белавія" Ігар Чаргінец на пытанне журналістаў аб спазненні самалёта.
Сустракаць брэндаваны "танкалёт" выйшла кіраўніцтва авіякампаніі "Белавія" на чале з дырэктарам Анатолем Гусаравым і кіраўніцтвам Нацыянальнага аэрапорта Мінск. Лайнер пасля пасадкі аблілі фантанам з брандсбойтаў, і да журналістаў і ўсіх, хто прагнуў сустрэчы, самалёт з "танкавышыванкай" на борце пад'ехаў свежапамытым.
Кампанія "Белавія" — найбуйнейшы нацыянальны перавозчык, гульня World of Tanks была прыдуманая ў Беларусі. Самыя вядомыя і пазнавальныя брэнды рэспублікі аб'ядналі свае намаганні, каб прасоўваць імідж нашай краіны за мяжой.
Яркі вобраз "танкалёта", як ужо ахрысцілі брэндаваны боінг у сацсетках, задумалі дызайнеры Wargaming, рэалізацыяй канцэпцыі займаліся чэшскія прафесіяналы. Boeing 737-300 прыляцеў у Мінск з Астравы. Яшчэ ўчора спецыялісты "дамалёўвалі" апошнія штрыхі на бартах і фюзеляжы лайнера. На "размалёўку" танкалёта сышло 300 літраў фарбы і 450 квадратных метраў трафарэта. 13 спецыялістаў працавалі 1800 гадзін.
