МІНСК, 4 жні — Sputnik. Міжнародны алімпійскі камітэт (МАК) прыняў рашэнне ўключыць у праграму летняй Алімпіяды 2020 года, якая пройдзе ў Токіа, пяць новых відаў спорту.
Члены МАК на 129-й сесіі выказаліся за ўключэнне пяці новых відаў спорту: бейсбол/софтбол, каратэ, сёрфінг, скалалажанне і скейтбордынг, ніхто не галасаваў супраць. Уключэнне гэтых відаў дадасць у праграму Гульняў 18 падзей, удзел у якіх возьмуць 474 спартсмены. Уключэнне гэтых відаў спорту не будзе мець істотнага ўплыву на існуючыя ў праграме віды спорту, яны не будуць абавязковымі для гарадоў, якія будуць прымаць Гульні ў будучыні.
"Гульні ў Токіа могуць стаць унікальнымі ў гісторыі Алімпіяд за кошт гэтых пяці новых відаў спорту", — сказаў прэзідэнт аргкамітэта Алімпіяды-2020 у Токіа Ёсіра Моры.
Ці прыедзе MLB?
Самым папулярным відам спорту сярод пяці уключаных у праграму такійскіх Гульняў, безумоўна, з'яўляецца бейсбол, які апошні раз быў на Алімпіядах у 2008 годзе. Чаму ў Азіі, а не ў ЗША? Менавіта ў гэтым рэгіёне гэты від спорту стаў папулярны апошнія гады. Як заявілі прадстаўнікі аргкамітэта, у іх ёсць дамоўленасць, што ўсе вядучыя лігі свету спыняць свой сезон дзеля Алімпіяды.
Адзіным выключэннем з'яўляецца MLB (Галоўная бейсбольная ліга), найстарэйшая прафесійная ліга і адна з самых багатых ліг у свеце. Раней MLB не спыняла свой чэмпіянат на час правядзення Алімпіяды, таму тры з пяці апошніх залатых медалёў выйгралі кубінцы. У тое, што гульцы MLB прыедуць на Алімпіяду, верыцца з цяжкасцю, але калі гэта здарыцца, то стане асаблівым момантам для Гульняў.
Стыль жыцця
Сёрфінг і скейтбордынг — гэта два віды спорту, якія звязаны са стылем жыцця. З'яўленне іх у праграме Алімпіяды дапаможа прыцягнуць больш маладой аўдыторыі і стаць папулярнымі. За прыкладамі далёка хадзіць не трэба — у 1998 годзе ў праграму зімовых Гульняў быў уключаны сноўборд, які цяпер стаў неад'емнай часткай Алімпіяд.
"Гэта гістарычны момант для ўсяго сёрфінгу, папулярнасць нашага віду спорту расце з кожным годам. Алімпіяда стане магчымасцю для яго раскрыцца для свету і атрымаць новых прыхільнікаў. Сёрфінг дапаможа зрабіць Алімпіяду ў Токіа асаблівай", — сказаў прэзідэнт Міжнароднай асацыяцыі.
