МІНСК, 15 жні — Sputnik. Беларускі барэц Джавід Гамзатаў выйграў бронзавы медаль Алімпійскіх гульняў у Рыа-дэ-Жанейра ў спаборніцтвах па грэка-рымскай барацьбе.
Спаборніцтвы ў катэгорыі да 85 кілаграмаў прайшлі ў Рыа ў панядзелак. Гамзатаў стартаваў на турніры, абыходзячы стадыю адборачнага раунда і пачаўшы барацьбу за алімпійскія ўзнагароды з 1/8 фіналу. На гэтай стадыі прызёр чэмпіянату свету 2013 года і нядаўні пераможца кваліфікацыйнага алімпійскага турніру адолеў кітайца Пен Фея (4:0). У чвэрцьфінале Гамзатаў святкаваў перамогу над аўстрыйскім змагаром Амэрам Хрустановічам (9:0). У фінал беларусу перашкодзіў прабіцца украінец Жан Белянюк (0:6).
За трэцяе месца на алімпійскім п'едэстале 27-гадовы Гамзатаў змагаўся з прадстаўніком Балгарыі Мікалаем Байраковым. Першы перыяд застаўся за барцом з Беларусі — 4:0. У другім адрэзку паядынку балгарын здолеў адквітаць адно ачко, але гэтага, натуральна, было недастаткова. Выніковы лік 4:1, і бронзавы медаль дастаўся Гамзатаву.
Золата дасталося расеіяніну Давіду Чакветадзэ, які адолеў украінца Белянюка з лікам 9:2.
Медаль Гамзатава — пяты ў скарбонцы зборнай Беларусі на гэтых Гульнях-2016. Да гэтага ўзнагароды былі заваяваны ў скачках на батуце (золата), цяжкай атлетыцы (два срэбры) і плаванні (бронза). У неафіцыйным медальным заліку Беларусь на дадзены момант займае 32-е месца.
Гамзатаў нарадзіўся ў дагестанскім Кізілюрце 27 снежня 1989 года. У Беларусь спартсмен пераехаў дзесяць гадоў таму, дзе стаў займацца ў Аліма Селімова і Маліка Эскендарава.
У аўторак, 16 жніўня, на алімпійскі дыван выйдзе яшчэ адзін беларускі барэц-класік Цімафей Дзейнічэнка, які пачне спаборніцтвы ў вагавай катэгорыі да 98 кг. Алімпійскія спаборніцтвы па вольнай барацьбе пачнуцца 17 жніўня. Беларусь прадставяць пяць атлетаў: Асадулла Лачына (57 кг), Амар Магамедаў (86 кг), Ібрагім Саідаў (125 кг), Марыя Мамошук (63 кг) і Васіліса Марзалюк (75 кг). Барцоўскія баталіі на дыванах "Карыока Арэны" завершацца ў апошні дзень Алімпійскіх гульняў 21 жніўня.
