Бронзавы прызёр Гульняў-2016 Герасіменя – у Мінску

МІНСК, 17 жні — Sputnik. Бронзавы прызёр Алімпійскіх гульняў у Рыа-дэ-Жанейра беларуская плыўчыха Аляксандра Герасіменя прыбыла ў Мінск, паведамляе карэспандэнт Sputnik.

У аўторак увечары ў Нацыянальным аэрапорце Мінск прызямліўся самалёт з нацыянальнай зборнай па плаванні на чале з бронзавай медалісткай Гульняў-2016. Сустракалі "Залатую рыбку" Беларусі ўрачыста — з аркестрам і кветкамі. Сярод тых, хто сустракаў — родныя і блізкія алімпійцаў.

"Саша — не зорнае дзіця, і ніколі не абцяжарвала нас сваімі праблемамі", — распавялі Sputnik бацькі Аляксандры Герасімені.

Па іх словах, зараз заўзець на спаборніцтвах за дачку значна складаней — паўсюль паказваюць Алімпіяду. Раней, калі Аляксандра толькі пачынала займацца плаваннем і браць удзел у буйных турнірах, такой увагі і асвятлення ў СМІ не было, прызналіся бацькі.

У мінулую суботу Герасіменя стала бронзавым прызёрам Гульняў-2016 у Рыа на дыстанцыі 50 метраў вольным стылем. На фінішы 30-гадовая беларуска паказала час 24,11 секунды, што стала новым нацыянальным рэкордам. Чэмпіёнкай у гэтай дысцыпліне стала дацкая плыўчыха Перніла Блюм, праплыўшы дыстанцыю за 24,07 секунды, срэбра заваявала амерыканка Сымон Мануэль — 24,09 секунды.

На Алімпійскіх гульнях-2012 у Лондане Герасіменя была сярэбраным прызёрам у гэтай намінацыі з вынікам 24,28 секунды. Яшчэ адно срэбра лонданскай Алімпіяды яна заваявала на стометроўцы кролем.