МІНСК, 19 жні — Sputnik. Надвор'е ў Беларусі на выходных будзе па-сапраўднаму летнім, у асобных раёнах краіны — спякота, паведаміў Sputnik начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыёактыўнага забруджвання і маніторынгу навакольнага асяроддзя Дзмітрый Рабаў.
Раней сіноптыкі прагназавалі вяртанне на тэрыторыю рэспублікі цёплага надвор'я ў канцы працоўнага тыдня.
"На выходных надвор'е the best. Пачала ўзмацняцца вобласць высокага ціску. Яна разгорне паветраныя патокі на паўднёва-заходнія і пачне аказваць дамінуючы ўплыў на надвор'е. У Беларусь вернецца летні характар надвор'я. У краіну пачнуць паступаць цёплыя паветраныя масы, што неадкладна адаб'ецца на павышэнні тэмпературнага фону", — распавёў Рабаў.
Аднак, паводле слоў спецыяліста, блізкасць атмасфернага фронту паўплывае на надвор'е на ўсходзе краіны ў суботу і ў нядзелю — на Брэстчыне. Рабаў растлумачыў, што там не выключаны невялікія ападкі і навальніцы.
"А тэмпература паветра складзе: у суботу ўначы +10…16°С, месцамі +7…9°С; удзень +22…28°С. У нядзелю ўначы +9…15°С, па захадзе да +17°С; удзень ад +24°С па паўночным усходзе, да +31°С па поўдні краіны", — распавёў Рабаў.
Горача будзе і ў сталіцы Беларусі. Як адзначыў Рабаў, у суботу паветра ў Мінску прагрэецца ўначы да +14°С, удзень да +26°С. Ні дажджоў, ні навальніц не прагназуецца. У нядзелю таксама без ападкаў. "Тэмпература ўначы +12…14°С, удзень +26…28°С", — удакладніў суразмоўца агенцтва.
"У панядзелак на фоне высокага атмасфернага ціску будзе праходзіць малаактыўны атмасферны фронт, які прынясе ў асобныя раёны кароткачасовыя дажджы, навальніцы. Але будзе па-ранейшаму вельмі цёпла: уначы +11…18°С, удзень +24…29°С, па паўднёвым усходзе +30…32°С", — праінфармаваў Рабаў.
Пачатак будучага тыдня ў Мінску таксама выдасца гарачым.
