МІНСК, 25 жні — Sputnik. Жывёлы ў Мінскім заапарку накормлены, але дапамогуць "знішчыць" лішкі ўраджаю, паведамілі ў заапарку.
"Мы гатовы прыняць у дар для нашых жывёл лішкі садавіны і гародніны, а таксама мяккія цацкі, адзенне, коўдры. Гэта не значыць, што нашы жывёлы дрэнна накормлены, у іх дастаткова ежы", — паведаміла Sputnik у чацвер малодшы навуковы супрацоўнік установы Таццяна Ільясава-Конанава.
З яе слоў, стала ўжо традыцыяй, што ў канцы лета — напачатку восені індывідуальныя прадпрымальнікі і простыя мінчукі звяртаюцца да нiх з прапановамі забраць для жывёл лішкі садавіны і гародніны.
"Гэта практыкуюць многія заапаркі ў розных краінах свету", — патлумачыла яна.
"Нам прывозяць і кавуны, і яблыкі, і шынкі, і дыні. Для рацыёну жывёл патрэбны і такія, скажам, рэдкія расліны, як рабарбар, шчаўе", — сказала суразмоўца агенцтва.
Са слоў Ільясавай-Конанавай, для шматлікіх жывёл садавіна і гародніна патрэбна не толькі для ежы, але і для "ўзбагачэння асяроддзя".
"Скрыначкі сланечніку, спаржавая фасоля патрэбны, да прыкладу, для малпачак і папугаяў, яны могуць гадзінамі выкалупваць насенне", — патлумачыла суразмоўца агенцтва.
Таксама яна распавяла, што ў жывёл ёсць свае перавагі — да прыкладу, мядзведзь Трыстан вельмі любіць кавуны, малпачкі — вінаград, яблыкі, а рыбы паку з сямейства піраньевых у захапленні ад беларускіх шынкоў. Ілясава-Конанава распавяла, што мінчукі ўжо пачалі прыносіць яблыкі новага ўраджаю.
"Таксама пачалі прыносіць вопратку. Некалькі дзён таму жанчына прынесла пялёнкі і мяккія цацкі для нашых малпачак", — адзначыла яна.
У заапарку будуць рады прыняць лішкі ўраджаю: гарох у струках, фасолю, ягады, грыбы, кукурузу ў пачатках, кавуны, дыні, кошыкі сланечніку, вінаград, шчаўе, рабарбар, салат, шынкі, гарбузы, яблыкі, грушы.
Прадукты ў дар для жывёл павінны быць свежыя і добрай якасці.
