МІНСК, 1 вер — Sputnik. Праваслаўнае духавенства 1 верасня будзе маліцца ў храмах з нагоды пачатку новага навучальнага года, паведамілі ў БПЦ.
"1 верасня ў Свята-Духавым кафедральным саборы Мінска адбудзецца ўрачысты малебен з нагоды пачатку новага навучальнага года. Богаслужэнне ўзначаліць мітрапаліт Мінскі і Заслаўскі Павел, Патрыяршы Экзарх усяе Беларусі", — паведамілі Sputnik у прэс-службе Мінскай епархіі.
Чакаецца, што на набажэнстве будуць прысутнічаць прафесары, выкладчыкі Беларускага дзяржаўнага універсітэта, а таксама студэнты беларускіх ВНУ. Пачатак малебну а 12:00, удакладнілі суразмоўцы агенцтва.
Святары распавялі, што "праваслаўная царква заўсёды благаслаўляла навучэнцаў, за вучняў заступаюцца і многія святыя". "Існуюць адмысловыя малітвы аб дапамозе ў засваенні ведаў, напрыклад, да Сергія Раданежскага, які з'яўляецца адным з самых шануемых і любімых праваслаўнымі заступнікаў вучэння", — падкрэслілі ва ўпраўленні.
"Ёсць і адмысловы абраз Багародзіцы, які называецца "Прыбытак розуму", — распавялі святары.
Як паведамілі агенцтву ў рымска-каталіцкай царкве ў Беларусі, каталікі таксама моляцца ў гэты дзень за вучняў, настаўнікаў і бацькоў.
"1 верасня ў мінскіх каталіцкіх парафіях будуць асвячаць школьныя прыналежнасці", — паведамілі ў РКЦ у Беларусі.
