МІНСК, 31 жні — Sputnik. Грамадзяне Беларусі за апошнія пяць гадоў сталі ўжываць больш свежых гародніны і садавіны, а імпарт плодаагародніннай прадукцыі паступова зніжаецца, паведамілі Sputnik ва ўпраўленні спажывецкага рынку харчовых тавараў Міністэрства гандлю.
Некаторы час таму прэзідэнт Беларусі паўшчуваў грамадзян краіны за тое, што яны аддаюць перавагу нездаровай ежы, і параіў не налягаць на "мяса з бульбай". Паводле звестак Мінгандлю, у 2015 годзе на ўнутраным рынку было прададзена каля 180 тысяч тон гародніны, гэта амаль на 40 тысяч тон больш, чым у 2010 годзе. Продаж садавіны і ягад за пяць гадоў вырас больш чым у 3 разы і за 2015 год склаў 280 тысяч тон. У разліку на душу насельніцтва ў 2015 годзе кожны грамадзянін краіны з'еў 145 кілаграмаў гародніны і 79 кілаграмаў садавіны.
"Аб'ём спажывання свежых гародніны і садавіны расце, і радуе, што гэта нават вышэй рацыянальных нормаў спажывання", — прывялі ў Мінгандлі словы начальніка ўпраўлення Святланы Слінько.
Паводле звестках ведамства, сёлета ў першым паўгоддзі беларускія прадпрыемствы павялічылі продаж свежых гародніны і бульбы на 5,2%, продаж свежай садавіны вырас на 1,2%. Пры гэтым павялічыўся і продаж і гародніны беларускай вытворчасці — на 3,4%.
"У Беларусі не толькі павялічваецца спажыванне гародніны, але змяняецца і яе структура: грамадзяне пачалі есці больш гародніны і менш налягаць на бульбу", — адзначылі ў міністэрстве.
Пры гэтым у Мінгандлю канстатавалі і істотнае зніжэнне імпарту гародніны і садавіны ў студзені-чэрвені гэтага года. Так, імпарт бульбы знізіўся ў натуральным выражэнні на 45,7%, цыбулі — на 66,3%, капусты — на 52%, яблыкаў — на 13,8%.
Рост паказалі ў асноўным толькі імпартныя пастаўкі таматаў, аднак гэта тлумачыцца тым, што беларускі клімат не вельмі падыходзіць для вырошчвання гэтай сельгаскультуры, а парніковыя таматы беларускай вытворчасці не могуць канкурыраваць па цане з імпартнай прадукцыяй.
