МІНСК, 11 вер — Sputnik. Кіраўнік беларускай дзяржавы Аляксандр Лукашэнка разам з малодшым сынам Мікалаем прыбыў на выбарчы ўчастак №509 Старавіленскай выбарчай акругі горада Мінска, размешчаны ў Беларускім дзяржаўным універсітэце фізічнай культуры. На гэтым участку, які СМІ называюць "участкам нумар адзін", прэзідэнт традыцыйна галасуе падчас выбараў у краіне.
Лукашэнка павітаў членаў камісіі, прад'явіў пашпарт, распісаўся ў спісах выбаршчыкаў і атрымаў бюлетэнь, зрабіў свой выбар і апусціў бюлетэнь у скрыню для галасавання, перадае карэспандэнт Sputnik з месца падзей.
Звычайна бюлетэнь у скрыню апускаў малодшы сын прэзідэнта, аднак у 2016 годзе беларускі лідэр адмовіўся ад гэтай традыцыі. Хоць іншыя выбаршчыкі, прыпісаныя да гэтага ўчастку, прыйшлі ў дзень галасавання з дзецьмі і з задавальненнем пазіравалі з імі перад шматлікімі фота- і відэакамерамі беларускіх і замежных журналістаў.
Кіраўнік дзяржавы меў магчымасць аддаць голас за аднаго з пяці кандыдатаў, сярод якіх вядомая беларуская спявачка Ірына Дарафеева, неаднаразовы ўдзельнік прэзідэнцкіх выбарчых кампаній Віктар Цярэшчанка, а таксама сын экс-кіраўніка Федэрацыі прафсаюзаў Андрэй Козік.
Пасля прэзідэнт пагутарыць з беларускімі і замежнымі журналістамі. На ўчастку сабралася каля 70 прадстаўнікоў СМІ.
