Назіральнікі ад Міжпарламенцкай Асамблеі СНД (МПА СНД) высока ацанілі падрыхтоўку да выбараў у парламент Беларусі.
Яны адзначылі, што не першы раз удзельнічаюць у выбарчых кампаніях Беларусі ў якасці назіральнікаў. Па словах намесніка генеральнага сакратара Савета МПА СНД — прадстаўніка Парламента Рэспублікі Казахстан Халеля Бакенова, прагрэс у выбарчым заканадаўстве нашай краіны відавочны.
"З любым дакументам можаш азнаёміцца, уся інфармацыя маецца, пры апячатванні скрыняў нам іх паказалі — калі ласка, глядзіце. Мы адчулі гатоўнасць выбаркамаў да правядзення выбараў, а ў людзей на душы свята, што яны рыхтуюцца абраць годных парламентарыяў", — падзяліўся сваімі ўражаннямі назіральнік.
У сваю чаргу, каардынатар групы міжнародных назіральнікаў ад МПА СНД Уладзімір Бажко адзначыў вялікую цікавасць назіральнікаў да парламенцкіх выбараў, якія праходзяць сёння ў Беларусі.
"У вас краіна дынамічна развіваецца, вы знаходзіцеся ў цэнтры Еўропы, у вас вельмі самастойная палітыка, унутраная і знешняя. Зразумела, цікавасць ва ўсіх вялікая", — растлумачыў Бажко.
Па афіцыйных дадзеных, у асноўны дзень выбараў сачыць за выбарчым працэсам будуць каля 800 міжнародных, а таксама больш за 35 тысяч унутраных назіральнікаў.
