МІНСК, 12 вер — Sputnik. Інтэрактыўная выстава, натхнёная 125-гадовым юбілеем з дня наражэння беларускага паэта-рамантыка Максіма Багдановіча, адкрыецца ў Музеі гісторыі беларускага кіно. Канцэпцыя выставы складаецца з твораў на тэму разнастайнасці праяў прыгажосці і чараўніцтва раслін. Тонкія вобразы, падслуханыя ў вершах, сплеценыя ў круглагадовы сімвал дабрабыту і святочнасці — вянок, які ў любую паравіну года прыцягвае нашу ўвагу да радасных падзей.
На выставе будуць прадстаўлены работы Вольгі Бабурынай, народнага майстра Беларусі па выцінанцы, мастака і педагога, Наталлі Сухой — мастака, майстра выцінанкі, Веры Янушэўскай — мастака, майстра выцінанкі, аўтара ідэі выставы.
Падчас выставы адбудзецца тры майстар-класы па выцінанцы, тры музычныя сустрэчы, а таксама лекцыя Ірыны Мазюк па архаічнай манеры спеваў, лекцыя і канцэрт Стася Чавуса і Дзяніса Сухога пра традыцыйныя народныя інструменты, танцавальная вечарына ў народным стылі і іншае.
Адкрыццё выставы адбудзецца ў Музеі гісторыі беларускага кіно 15 верасня 2016 года а 19.00 па адрасе г. Мінск, вул. Рэвалюцыйная, 10 (каля Чырвонага касцёла).
Уваходны квіток 25 000 (2,5) руб. Студэнтам і школьнікам зніжка.
