Намеснік старшыні "Таварыства беларускай мовы" Алена Анісім, абраная дэпутатам Палаты прадстаўнікоў па 70-й Стаўбцоўскай акрузе, паведаміла ў інтэрв'ю радыё Sputnik, што ў першую чаргу мае намер прасоўваць у парламенце законапраект аб падтрымцы беларускай мовы.
"У гэтым плане я вельмі разлічваю на нашу эліту і спадзяюся на пэўныя колы ў дзяржаўных органах улады. Пераход на выкарыстанне роднай мовы будзе спрыяць эмацыйнаму і духоўнаму ўздыму народа, без якога не можа быць руху наперад", — патлумачыла новаабраны дэпутат.
Акрамя таго, Анісім мае намер у першую чаргу падымаць у парламенце пытанні, якія хвалююць усіх — перагляд памераў заробкаў, ажыццяўленне пенсійнай рэформы, рэфармаванне сістэмы падаткаабкладання ў бок большай празрыстасці і прадказальнасці.
