ВІЛЬНЮС, 19 вер — Sputnik, Аляксандр Ліпавец. Прадпрымальнік з Мінска Раіса Гугова, член Саюза народных майстроў Беларусі, ужо трэці год запар прывозіць свае унікальныя пернікі на "Кірмаш народаў".
"Я з дзяцінства любіла ў Вільню прыязджаць — адпачыць, пераключыцца. На літоўскай зямлі беларусы заўжды сябе адчувалі добра і камфортна, як у гасцях у добрых суседзяў", — сказала Sputnik Гугова і дадала, што на кірмаш — народ паглядзець і сябе паказаць — прыехала цэлая каманда беларускіх майстроў з Оршы, Віцебска і Мінска пад кіраўніцтвам прадпрымальніка Рамана Баярынцава.
"Я прыводжу сюды свае пернікі, якія вельмі адрозніваюцца ад мясцовых па смаку, па складзе, па роспісу. Можа таму я ніяк не канкурую з мясцовымі "пернікаводамі", і тут у мяне ўжо ёсць свае пакупнікі — мясцовыя жыхары Вільнюса, якія мяне пазнаюць, радуюцца і кажуць, што ім вельмі падабаюцца мае пернікі", — працягнула дзяліцца ўражаннямі беларуская кандытар.
Унікальны рэцэпт свайго перніка Раіса ў свой час распрацавала для сваіх унукаў, каб у ім былі экалагічна чыстыя інгрэдыенты і ён задавальняў сучасным запытам так званага "правільнага харчавання". Гугова сцвярджае, што ў яе перніках няма маргарыну і цукру, а цеста замешваецца на чыстым сметанковым масле. А галоўнае — пэўны букет адмысловых прыпраў, які дае мінскаму перніку ўласцівы толькі яму водар.
"Гэта як параўнаць вялікі кубак растваральнай кавы і маленькі кубачак зваранай па адмысловым рэцэпце. Так і тут — можна з'есці велізарны маргарынавы пернік, які напоўніць і раздьме твой страўнік, а можна з'есці вось гэты невялікі пернік для гурманаў з пэўным смакавых букетам, які падабаецца знатакам тонкіх адчуванняў. А галоўнае, чым мае пернікі адрозніваюцца — гэта формай, расфарбоўкай і малюнкам на іх славутасцяў Мінска. Вось пернік з касцёлам на ратушнай плошчы, а вось — з будынкам знакамітага Мінскага вакзала", — завяршыла невялікае рэкламнае прадстаўленне сваёй прадукцыі прадпрымальнік з Мінска Раіса Гугова.
Канкурэнцыю беларускім кандытарам на літоўскім кірмашы складалі армяне са сваімі традыцыйнымі прысмакамі — пахлавой, чурчхелай і халвой. Іх смак можна было параўнаць і з турэцкай халвой. А прыхільнікі віртуальных пакемонаў маглі паспрабаваць іх і на смак. Прадпрымальныя кандытары ўжо паспелі стварыць лядзяшы на палачках у форме гэтых віртуальных монстрыкаў.
Наведвальнікі кірмашу, якія за час прагулкі па шэрагах гандлёвых намётаў паспявалі прагаладацца, маглі падсілкавацца гарачымі стравамі традыцыйнай літоўскай кухні.
"Кірмаш народаў" праходзіць у Вільні ўжо ў восьмы раз. Сёлета на суд гледачоў і пакупнікоў сваю прадукцыю прадставілі больш за 200 прадпрымальнікаў. За тры дні працы, паводле інфармацыі арганізатараў, кірмаш наведала больш за 150 тысяч чалавек.
