МІНСК, 28 вер — Sputnik. Колькасць выяўленых жывёл з шаленствам у Беларусі з пачатку года на 5,5% вышэй, чым за аналагічны перыяд 2015 года, паведамілі Sputnik у Міністэрстве аховы здароўя рэспублікі.
У сераду адзначаецца Сусветны дзень барацьбы супраць шаленства. Медыкі нагадваюць: захворванне з'яўляецца вострай інфекцыяй і ўяўляе сур'ёзную пагрозу.
"На шаленства хварэюць практычна ўсе віды млекакормячых. Рэспубліка Беларусь уваходзіць у лік краін, дзе на працягу доўгага часу вірус шаленства сярод жывёл часцей распаўсюджваюць дзікія драпежныя, пры высокай шчыльнасці іх селішча", — адзначылі ў Міністэрстве аховы здароўя.
Аднак колькасць выяўленых выпадкаў захворвання не радуе: за 8 месяцаў 2016 года ў параўнанні з аналагічным перыядам мінулага года колькасць выпадкаў шаленства сярод жывёл у краіне павялічылася на 5,5%.
Паводле слоў спецыялістаў, часцей шаленства сталі выяўляць сярод жывёл у Гомельскай, Брэсцкай і Віцебскай абласцях, у астатніх абласцях колькасць хворых на шаленства зніжаецца. У Мінску з пачатку года быў выяўлены толькі адзін выпадак: захварэла кошка.
Самыя небяспечныя — лісіцы
Большасць жывёл з шаленствам — дзікія, асабліва лісіцы. Але, у той жа час, на 39,7% павялічылася захворванне на шаленства сярод хатніх жывёл. У пераважнай большасці, удакладнілі ў Міністэрстве аховы здароўя, захворвалі непрышчэпленыя жывёлы.
"У першым паўгоддзі 2016 года зарэгістравана 10 выпадкаў масавага кантакту людзей з хворымі на шаленства жывёламі, у выніку чаго пацярпела 97 чалавек, з іх 12 дзяцей", — дадалі суразмоўцы агенцтва.
Павялічылася і колькасць тых, хто звярнуўся да медыкаў па дапамогу ў барацьбе з захворваннем людзей. Прышчэпкі ад шаленства прызначылі больш чым васьмі тысячам беларусаў. "Дзякуючы прафілактычнай рабоце, якая праводзіцца, выпадкаў захворвання на шаленства сярод насельніцтва ў 2013-2015 гадах і за мінулы перыяд 2016 года не рэгістравалася", — заключылі медыкі. Звесткі пра смяротна небяспечнае захворванне сёлета часта з'яўлялася ў навінах: шалёныя жывёлы з'яўляліся нават у такіх буйных гарадах, як Пінск і Барысаў.
