МІНСК, 5 кас — Sputnik. Еўрапейскі саюз разлічвае, што ў Беларусі адменяць смяротнае пакаранне, і гатовы прадаставіць дзеля гэтага ўсю неабходную дапамогу, заявіў на прэс-канферэнцыі ў сераду ў Мінску намеснік кіраўніка Прадстаўніцтва ЕС у Беларусі Джым Казанс.
У Мінску пачаўся Тыдзень супраць смяротнага пакарання, у рамках якога праваабаронцы прэзентуюць даклад "Смяротнае пакаранне ў Беларусі: забойствы на (не)законных падставах".
"У ЕС разлічваюць, што ў Беларусі ўвядуць мараторый на смяротнае пакаранне, а пасля адменяць яго. ЕС прадаставіць усю неабходную дапамогу, каб Беларусь адмовілася ад смяротнага пакарання", — заявіў Казанс.
Ён таксама выказаў надзею, што ўсім асуджаным на смяротнае пакаранне ў рэспубліцы заменяць гэта пакаранне на пажыццёвае, і камеры смяротнікаў адыйдуць у гісторыю.
"Ва ўсім свеце прымаюць такія крокі. Сёлета мараторый на смяротнае пакаранне ўведзены ў Конга, Фіджы, Мадагаскары, Сурынаме, Гвінеі, Манголіі. Няма нагод для таго, каб Беларусь не далучылася да гэтых краін", — сказаў ён. Пры гэтым Казанс падкрэсліў, што часам грамадства супраць таго, каб было адменена смяротнае пакаранне.
"Таму важна, каб урад узяў на сябе адказнасць, праявіў сілу і адмяніў смяротнае пакаранне. Тады і людзі пачынаюць разумець, што адмена смяротнага пакарання — гэта норма цывілізаванай дзяржавы. Не трэба забіваць, каб захаваць парадак", — сказаў прадстаўнік ЕС.
Казанс таксама адзначыў: ёсць пэўныя зрухі ў пытанні адмены смяротнага пакарання ў Беларусі, але ў Еўрасаюзе чакаюць канкрэтных крокаў.
Паводле яго слоў, у сакавіку 2016 года ў Мінску прайшла міжнародная канферэнцыя па пытанні адмены смяротнага пакарання, у якой узяў удзел прадстаўнік ЕС.
"Мы сталі абмяркоўваць пытанні смяротнага пакарання і з уладамі, і з грамадствам. Я б сказаў, што апошнія шэсць гадоў сітуацыя палепшылася. Пытанне абмяркоўваецца, але хацелася б канкрэтных крокаў", — сказаў ён.
Намеснік кіраўніка Прадстаўніцтва ЕС у Мінску вітаў тых, хто прыйшоў на прэзентацыю дакладу прадстаўнікоў шэрагу еўрапейскіх амбасадаў. Ён таксама заявіў, што ЕС выказаў занепакоенасць тым, што Вярхоўны суд Беларусі ў мінулы аўторак пацвердзіў смяротны прысуд Сяргею Вострыкаву.
Прысутная на прэзентацыі дакладу намеснік старшыні Міжнароднай федэрацыі правоў чалавека (FIDH) Флорэнс Беліўе паведаміла, што ўчора прысутнічала на абвяшчэнні рашэння Вярхоўнага суда, які пакінуў у сіле смяротны прысуд Сяргею Вострыкаву, які быў прызнаны вінаватым у жорсткім забойстве дзвюх жанчын.
