МІНСК, 6 кас — Sputnik. Самай пацярпелай з-за ўчорашняй непагадзі апынулася Віцебская вобласць — вецер, парывы якога дасягалі 21 метра за секунду, паваліў на легкавушкі ў абласным цэнтры як мінімум тры дрэвы, пацярпелі чатыры аўтамабілі, паведамілі ў абласным упраўленні МНС.
Акрамя таго, у вобласці без святла апынуліся 92 населеных пункта, 14 сельскагаспадарчых будынкі і 199 трансфарматарных падстанцый. Усе адключэнні аператыўна ліквідаваліся аварыйнымі брыгадамі, падкрэслілі ў МНС.
У выніку да 6-й гадзiны раніцы чацвярга электразабеспячэнне ў вобласці было цалкам адноўлена. У двух раёнах Гродзенскай вобласці — Бераставіцкім і Зэльвенскім — вецер пашкодзіў дахі дзвюх ферм. Аднак, адзначылі ў абласным МНС, вытворчы працэс не быў парушаны. Напярэдадні ратавальнікі мінскай вобласці казалі, што ў іх рэгіёне вецер пакінуў без святла больш за 25 населеных пунктаў. Гомельскую і Брэсцкую вобласць, мяркуючы па зводках рэгіянальных упраўленняў МНС, непагадзь пашкадавала. У Мінску вецер толькі валіў дрэвы. Зафіксавана сем выпадкаў падзення, у выніку якіх былі пашкоджаныя чатыры аўтамабілі. А вось адключэнняў электразабеспячэння не было.
"Добра жыхарам Мінска і буйных гарадоў. Электрасеткі — пад зямлёй. Усе вятры — амаль не адчувальныя (акрамя вельмі моцных) у плане перапынкаў электразабеспячэння", — патлумачыў у соцсетках адноснае "шанцаванне" сталіцы Начальнік інфармацыйна-аналітычнага аддзела ДВА "Белэнерга" Аляксандр Малькоў.
Усяго, паводле дадзеных "Белэнерга", за мінулыя суткі на тэрыторыі рэспублікі былі абясточаныя 334 населеныя пункты, 43 сельскагаспадарчых будынкі і 1046 трансфарматарных падстанцый. Да раніцы чацвярга без электразабеспячэння заставаліся толькі 9 населеных пунктаў у Пухавіцкім раёне Мінскай вобласці.
