МІНСК, 14 кас — Sputnik. Халоднае надвор'е захаваецца ў Беларусі на выходных дзякуючы прыходу ў рэспубліку з поўначы Еўропы паветраных мас, паведаміў Sputnik у пятніцу начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыёактыўнага забруджвання і маніторынгу навакольнага асяроддзя Дзмітрый Рабаў.
Надвор'е ў суботу і нядзелю будуць вызначаць скандынаўскі антыцыклон Peter і халодныя паветраныя масы, сярэдняя тэмпература складзе +3..+5°С, што на 3-5°С ніжэй за норму.
"У суботу будзе пераважна без ападкаў, уначы і раніцай у асобных раёнах слабы галалёд. Уначы тэмпература складзе —5..+1°С, удзень +2..+8°С", — сказаў Рабаў.
У нядзелю таксама чакаецца без ападкаў, уначы ад —4 да +3°С, удзень +2..+9°С. У пачатку тыдня, па словах сіноптыка, надвор'е не зменіцца: без дажджу, уначы ў асобных раёнах тэмпература апусціцца да —6°С, удзень слупкі тэрмометраў пакажуць +2..+ 9°С.
