Антон Клімко, Sputnik.
Любое чараўніцтва мае пад сабой чыста навуковае тлумачэнне. Менавіта гэта жадаюць паказаць арганізатары выставы "Відавочнае і неверагоднае: аптычныя эфекты", якая 2 лістапада адкрылася ў Гродне. Мы таксама прагуляліся па ёй і на сабе адчулі цудоўныя з'явы.
Лабірынт праз люстэрка
"Вось бы такі кабінет у школу! Вы б адны дзявяткі па фізіцы атрымлівалі", — кажа бацька свой дачцы-падлетку, якая разглядае адлюстраванне ў крывых люстэрках і робіць сэлфі.
На таблічцы побач пытанне: "Якое з люстэркаў памяншае выяву — выпуклае або ўвагнутае?" Адказ на яго на практыцы можа пазнаць нават шасцігадовае дзіця. Побач маленькі хлопчык спрабуе намаляваць алоўкам лабірынт, гледзячы на яго праз люстэрка.
Незвычайная фізіка, да якой можна дакрануцца
У невялікім пакоі размясцілася каля 30 розных інтэрактыўных экспанатаў. Кожны з іх наглядна тлумачыць уласцівасці святла і незвычайныя з'явы фізікі. Некаторыя з іх падобныя на фокусы. Узяць тую ж скрынку, у якой містычным чынам знікае рука, калі ўключыць святло.
Галоўнае правіла для кожнага наведвальніка — чапаць экспанаты і правяраць працу кожнага з іх. Для гэтага перад многімі з іх знаходзяцца спецыяльныя стульчыкі.
"Нас вучылі фізіцы ў школе, і многія да гэтага часу думаюць, што гэта сумна і немагчыма ўжываць у жыцці, убачыць. Тут усё ў даступнай форме можна ўбачыць на свае вочы. І галоўная наша задача — прыцягнуць маладое пакаленне да навукі.
Хацелася б, каб той, хто да гэтага схільны, змог зразумець гэта яшчэ ў дзіцячым узросце. Пасля пяці гадоў ці крыху сталей", — распавяла Аксана Ялова, арганізатар навуковых выстаў у Беларусі.
Выстава для дзяцей, з якой не могуць сысці дарослыя
Дзеці, і праўда, пачынаюць задаваць бацькам пытанні. Напрыклад, чаму твары на стэндзе сочаць за імі, як растлумачыць эфект мазаічнага люстэрка, чаму шкляны цыліндр згортвае каляровыя прамяні і многае іншае.
Тут можна ўбачыць павелічальнае шкло, люстэрка, якое перамяшчаецца, праверыць, як працуе накладанне розных фільтраў, пагуляць са светлавымі прамянямі. Ёсць тут і галаграфічны малюнак, прататып тэлескопа, прататып тэлекамеры. Тыя рэчы, з якімі сутыкаемся ў паўсядзённым жыцці.
Ўзрост, на які разлічана выстава, — прыкладна 5-14 гадоў. Але, як заўважылі арганізатары, у Гродне дарослыя на выставе затрымліваюцца нашмат даўжэй, чым дзеці.
Усе экспанаты прыехалі ў Беларусь з Польшчы. Мабільная выстава ад вытворцаў знакамітага варшаўскага Цэнтра навукі "Капернік" чатыры гады падарожнічала па Еўропе і сабрала тысячы станоўчых водгукаў.
Як паведамляюць арганізатары, Гродна стаў другім беларускім горадам, куды прыехала перасоўная навуковая экспазіцыя. Першыя два месяцы яна выстаўлялася ў Гомелі і атрымала вельмі добрыя водгукі. У Гродне яна будзе працаваць да 3 снежня.
