МІНСК, 10 ліс — Sputnik. Трохмільённым пасажырам у гэтым годзе ў Нацыянальным аэрапорце Мінск стала інжынер-праграміст з Мінска Віялета Бяліцкая, якая ляцела з Санкт-Пецярбурга, перадае карэспандэнт Sputnik.
Навіну пра свой адмысловы статус жанчына атрымала перад выхадам з самалёта.
"Калі самалёт ішоў на пасадку, сцюардэса абвясціла, што на борце знаходзіцца трохмільённы пасажыр. Ніхто не ведае, хто гэта, гэтага пасажыра будуць сустракаць. Лайнер прызямліўся, і яны абвясцілі маё імя. Я крыху прыхварэла, таму не скакала ад радасці, але было дзіўна. І прыемна", — распавяла Sputnik Бяліцкая.
Дзяўчыне ўручылі падарункі ад аэрапорта і кампаніі "Белавія": трохмільённы пасажыр стала ўладальнікам імяннога торта і сертыфіката, які дазваляе ёй на працягу года карыстацца паслугамі VIP-залы аэрапорта. "Я шмат лятаю, але такімі заламі не карысталася ніколі", — прызналася праграміст.
Бяліцкая ад "Белавія" таксама атрымала два адкрытых білета на любы прамы рэйс, акрамя таго, ёй прапанавалі трансфер да Мінска — за кошт аэрапорта.
Для беларускай грамадзянскай авіяцыі сустрэча трохмільённага пасажыра стала знакавай падзеяй, заявіў журналістам генеральны дырэктар Нацыянальнага аэрапорта Мінск Дзмітрый Мелікян.
"Гэта першы трохмільённы пасажыр на беларускай зямлі, перавезены на працягу года паветраным суднам. Нам паспрыялі праведзеная рэканструкцыя аэравакзальнага комплексу, устаноўка сучаснага тэхналагічнага абсталявання, якое забяспечвае бяспеку і дазваляе ажыццявіць хуткую рэгістрацыю пасажыра, багажу і дастаўку на паветранае судна. Плюс транзіт", — патлумачыў Мелікян.
Доля транзітных пасажырскіх перавозак праз аэрапорт Мінск павялічылася з 7% у 2015 годзе да 30% у 2016 годзе. Мелікян лічыць, што мінскі аэрапорт цалкам можна называць хабам, паколькі з пачатку года прырост пасажырапатоку склаў 22%.
"Глядзіце: мільён пасажыраў мы абслужылі ў 2008 годзе, у 2013-м абслужылі двухмільённага. Гэта значыць, там на прырост спатрэбілася пяць гадоў, тут — тры. У выпадку захавання тэмпаў, думаю, праз два гады ў нас будзе 4 мільёны", — распавёў журналістам намеснік генеральнага дырэктара па вытворчасці Нацыянальнага аэрапорта Васіль Корнеў.
