МІНСК, 27 ліс — Sputnik. Грамадскае аб'яднанне "Радзіслава" прадставіла інтэрактыўную карту выпадкаў хатняга гвалту ў Беларусі.
Паводле дадзеных ААН, кожная трэцяя беларуска становіцца ахвярай фізічнага хатняга гвалту. Спецыялісты сцвярджаюць, што псіхалагічнаму гвалту наогул падвяргаецца ў жыцці кожная другая.
Аб'яднанне "Радзіслава", якое спецыялізуецца на дапамозе жанчынам — ахвярам хатняга гвалту, запусціла на гэтым тыдні анлайн-карту з выпадкамі праявы агрэсіі да беларусак. На інтэрактыўную карту можна ўносіць дадзеныя пра гвалт, а чытаць іх можа кожны наведвальнік сайта — пры гэтым, інфармацыя пра аўтара будзе ананімнай.
Акрамя таго, праект прыводзіць важныя факты пра хатні гвалт. Напрыклад, што, згодна даследванням, "кожны пяты мужчына дапускаў магчымасць пагроз і запалохвання партнёркі".
Гісторыі на сайце паступова будуць дадавацца. Можна на сайце кампаніі "Радзіслава" пазнаёміцца і з актуальнай інфармацыяй па праблеме, а таксама спампаваць спецыяльныя інструкцыі або звярнуцца па дапамогу да юрыстаў і праваабаронцаў.
