МІНСК, 7 сне — Sputnik. Цікавасць да вывучэння польскай мовы ў Беларусі становіцца ўсё больш, заявіў на брыфінгу ў прэс-цэнтры Sputnik кіраўнік Саюза палякаў Беларусі (СПБ) Мечыслаў Лысы.
Кіраўнік арганізацыі мяркуе, што аднаўленне дыялогу паміж Беларуссю і Польшчай звязана як з аб'ектыўнымі, так і з суб'ектыўнымі прычынамі.
"Не могуць дзве краіны суседнія жыць у не вельмі цёплых адносінах — гэта аб'ектыўная прычына. Суб'ектыўная прычына — новыя людзі ва ўладзе ў Польшчы", — растлумачыў Лысы.
Паводле слоў госця прэс-цэнтра Sputnik, пацяпленне адносінаў абумоўлена і зменамі таксама ў Беларусі — "адсюль і зняцце санкцый з рэспублікі, і адкрытыя дзверы працэсу збліжэння паміж дзяржавамі".
Апошнім высокім візітам у рамках аднаўлення дыялогу стаў прыезд маршала польскага сената Станіслава Карчэўскага, у якога ў Беларусі была вельмі насычаная праграма.
Што робіць Саюз палякаў?
"Адна з асноўных мэт нашага саюза — садзейнічаць вывучэнню польскай мовы. Мы і да гэтага над гэтым працавалі, і цяпер. Попыт на вывучэнне польскай мовы ўвесь час расце, мы гэта бачым", — прызнаўся кіраўнік Саюза.
Паводле яго слоў, рэгулярна ў сталічным Доме польскім мову вучыць каля 400 чалавек, і прыходзіць туды можа любы чалавек. У самім жа СПБ сёння каля 5,5 тысяч чалавек, хоць у "залатыя часы" было каля 20 тысяч. Усяго ж у рэспубліцы палякаў — больш за 300 тысяч людзей.
Як аб'яднаць два саюзы?
Адсутнасць цікавасці да СПБ Лысы патлумачыў расколам Саюза ў 2005 годзе — тады з'явіўся афіцыйна зарэгістраваны СПБ і яшчэ адзін, неафіцыйны саюз.
"Натуральна і імкненне беларускіх палякаў да адзінага саюзу. Час ужо садзіцца за стол перамоваў. Але пакуль не відаць водгукаў з таго боку. Той, незарэгістраваны саюз, прыняў рашэнне з намі не аб'ядноўвацца", — адзначыў кіраўнік Саюза і дадаў, што апаненты СПБ таксама ініцыявалі ўвядзенне Польшчай санкцый супраць некаторых актывістаў аб'яднання.
Лысы дадаў, што падобныя канфлікты ўзнікаюць калі пераводзіць адносіны ў палітычны бок. "У галіне адукацыі і культуры не бачу падставы для канфліктных сітуацый, я заўсёды быў і застаюся на пазіцыі дыялогу", — сказаў на заканчэнне Мечыслаў Лысы.
