МІНСК, 8 сне — Sputnik. Часовы павераны ў справах Беларусі ў Швецыі Аляксей Паплаўскі прыступіў у Стакгольме да выканання сваіх абавязкаў, паведаміў начальнік упраўлення інфармацыі — прэс-сакратар МЗС Дзмітрый Мірончык.
Як паведаміў Мірончык у чацвер на брыфінгу ў Мінску, пакуль беларускі дыпламат працуе адзін, але па меры вырашэння арганізацыйных пытанняў (гэта ў тым ліку падбор памяшкання для амбасады, адкрыццё банкаўскага рахунку і некаторыя іншыя моманты) на працу ў Стакгольм будуць накіраваныя іншыя супрацоўнікі, якія зоймуцца развіццём эканамічных адносін, консульскімі пытаннямі.
Афіцыйны прадстаўнік беларускага МЗС таксама паведаміў, што яшчэ адзін беларускі дыпламат Аляксей Панфёраў 1 снежня з аналагічнай місіяй прыбыў у Іспанію, дзе праз некаторы час запрацуе паўнавартаснае дыпламатычнае прадстаўніцтва Беларусі.
Як раней паведамляў Sputnik, адносіны Беларусі і Швецыі ўскладніліся пасля таго, як у пачатку ліпеня 2012 года з борта шведскага самалёта, які несанкцыянавана перасёк мяжу Беларусі з боку Літвы, над некалькімі абласцямі краіны, у тым ліку над Мінскам, былі скінутыя плюшавыя мішкі з прымацаванымі да іх лозунгамі ў падтрымку свабоды слова. У адказ на гэта Беларусь адазвала з Швецыі свайго амбасадара і прапанавала тое ж самае зрабіць шведскаму боку.
Вясной 2013 года Мінск даў згоду на вяртанне ў краіну часовага паверанага ў справах Швецыі. 30 красавіка ўрад Швецыі прызначыў новага амбасадара ў Мінску, ім стаў Марцін Оберг.
