МІНСК, 14 сне — Sputnik. Этна-трыа "Троіца" выступіць у Мінску з традыцыйным зімовым канцэртам 16 снежня. Карэспандэнт Sputnik пагутарыў з заснавальнікам і лідэрам калектыву Іванам Кірчуком напярэдадні каляднага канцэрту.
Кірчук распавёў, што гурт прадставіць гледачу новы жанр сваіх выступленняў — фолк-сюіты.
"У фолк-сюітах мы можам выкарыстоўваць куды больш музычных інструментаў, чым падчас выканання песень. Таксама на канцэрце прадставім новыя песні, зайграем і вядомыя ў новых аранжыроўках", — сказаў Кірчук.
На канцэрце будуць прадстаўлены песні, які сёлета ўжо былі прэзентаваны ў Чылі і Вялікабрытаніі. "А дома яны дык наогул на ўра пойдуць", — спадзяецца лідэр этна-трыа.
Ён таксама адзначыў, што менавіта да Мінскага канцэрту гурт заўжды рыхтуецца вельмі сур'ёзна.
Традыцыйны штогадовы зімовы канцэрт этна-трыа "Троіца" адбудзецца ў мінскім Моладзевым тэатры эстрады 16 снежня. Кошт квіткоў складае ад 25 да 35 рублёў.
