МІНСК, 22 сне — Sputnik. Прызначаная на пасаду кіраўніка Адміністрацыі прэзідэнта Беларусі Наталля Качанава дайшла да такой высокай пасады менш чым за дзесяць гадоў, бо яшчэ ў 2007-м яна ўзначальвала гарвыканкам сярэдняга па беларускіх мерках горада Наваполацка.
Прэзідэнт Беларусі Аляксандр Лукашэнка ў сераду прыняў рашэнне прызначыць віцэ-прэм'ера Качанаву кіраўніком сваёй адміністрацыі. Sputnik успомніў некалькі цікавых фактаў з біяграфіі Качанавай.
Захаплялася спортам. У школьныя гады Качанава займалася лёгкай атлетыкай, крыху пазней захаплялася валейболам. У гэтым відзе спорту яна дасягнула пэўных поспехаў — у прыватнасці, выступала на рознага ўзроўню спаборніцтвах. Ужо па заканчэнні вучобы ў палітэхнічным універсітэце будучая глава прэзідэнцкай адміністрацыі сустрэла будучага мужа — таксама спартсмена, баскетбаліста.
Узначальвала гарвыканкам Наваполацка. На гэтую пасаду Качанава была прызначана ў 2007-м годзе, да гэтага яна некалькі гадоў курыравала ў гарадской адміністрацыі жыллёва-камунальную гаспадарку і будаўніцтва. Пад яе кіраўніцтвам быў створаны новы музей гісторыі і культуры Наваполацка і праведзена мадэрнізацыя радзільні.
Не вельмі публічная сям'я. У Качанавай дзве дачкі: адна абрала для сябе дарогу медыка, другая вывучала замежныя мовы. Дачкі чыноўніцы не гоняцца за публічнасцю: інтэрв'ю з імі знайсці не ўдалося. Стала ўжо Наталля Іванаўна і бабуляй — у яе старэйшай дачкі Вольгі двое дзяцей.
Аматарка чытання. Наталля Качанава шмат разоў публічна заяўляла пра сваю любоў да кнігі — так, у адным з інтэрв'ю яна прызнавалася, што любіць перачытваць Талстога і Дастаеўскага. Актыўна падтрымлівала яна і правядзенне Дня беларускага пісьменства — рэгулярна наведвала мерапрыемствы і ўдзельнічала ў іх падрыхтоўцы.
Першая жанчына — віцэ-прэм'ер. Менавіта Наталля Качанава першай у Беларусі змагла прайсці па кар'ернай лесвіцы да пасады віцэ-прэм'ера рэспублікі — яна была прызначана на пасаду ў 2014-м годзе. У сераду 21 снежня яна стала і першай жанчынай — кіраўніком Адміністрацыі прэзідэнта.
