МІНСК, 23 сне — Sputnik. Прэзідэнт Беларусі Аляксандр Лукашэнка падпісаў у пятніцу указ "Аб пенсійным забеспячэнні грамадзян, якія пацярпелі ў выніку акта тэрарызму", паведамілі Sputnik у прэс-службе кіраўніка дзяржавы.
Як праінфармавалі ў прэс-службе, дакумент накіраваны на ўзмацненне сацыяльнай абароны грамадзян, якім устаноўлена інваліднасць з прычыны цялесных пашкоджанняў, атрыманых непасрэдна ў выніку акта тэрарызму, што адбыўся 11 красавіка 2011 года ў Мінску на станцыі метро "Кастрычніцкая".
Ва ўказе таксама ўстаноўлены асобы парадак прызначэння і пераразліку пенсій пацярпелым пры тэракце. "Прызначэнне такіх пенсій будзе ажыццяўляцца зыходзячы з заробку, вызначанага за апошнія 12 месяцаў працы, якія папярэднічалі акту тэрарызму, з улікам паказчыка ступені страты прафесійнай працаздольнасці (замест усталяванай групы інваліднасці)", — удакладнілі ў прэс-службе.
Па распараджэнні Лукашэнкі пераразлік пенсій будзе забяспечвацца штомесяц у сувязі з ростам ў Беларусі сярэдняй заработнай платы. "Прыняты ўказ дазволіць павялічыць памеры пенсій грамадзянам, якія сталі інвалідамі з прычыны акта тэрарызму", — заключылі ў прэс-службе.
Тэрарыстычны акт адбыўся ў Мінскім метрапалітэне на станцыі "Кастрычніцкая" ўвечары 11 красавіка 2011 года. У выніку выбуху 15 чалавек загінулі, а яшчэ 203 пацярпелі. Прызнаных вінаватымі ў арганізацыі тэракту Дзмітрыя Канавалава і Уладзіслава Кавалёва расстралялі па рашэнні суда менш чым праз год — 15 сакавіка 2012 года.
