МІНСК, 24 сне — Sputnik. У конкурснай праграме фестывалю ў гэтым годзе прымуць удзел тэатральныя калектывы Беларусі, Расіі, Украіны, Польшчы, Сербіі, Літвы і іншых краін. Заяўкі падалі больш за 50 удзельнікаў з усіх абласцей Беларусі, а таксама з-за мяжы. Для ўдзелу ў конкурснай праграме адабраны 21 калектыў. Мерапрыемства, якое стала традыцыйным, адбываецца ўжо трэці год запар у перыяд калядных святак. Садзейнічанне ў правядзенні фестывалю аказвае Міністэрства культуры Рэспублікі Беларусь і Мінскі гарадскі выканаўчы камітэт.
Фестываль "Нябёсы" праходзіць па благаславенні Мітрапаліта Мінскага і Заслаўскага, Патрыяршага Экзарха ўсяе Беларусі Паўла. Заснавальнікамі мерапрыемства з'яўляюцца Мінская дыяцэзія, Свята-Лізавецінскі манастыр, сястрынства ў гонар св. прпмчц. Марыі. Мастацкі кіраўнік фестывалю — акцёр НАДТ ім. М. Горкага Аляксандр Ждановіч. Мэты фестывалю — развіццё традыцыйнага беларускага батлеечнага і лялечнага тэатральнага мастацтва, умацаванне міжнародных культурных сувязяў, папулярызацыя традыцый батлейкі, далучэнне да тэатральнага мастацтва падрастаючага пакалення, прэзентацыя дасягненняў у галіне народнай творчасці, павышэнне прафесійнага майстэрства ўдзельнікаў і падтрымка таленавітай моладзі.
Прадстаўленыя спектаклі будзе ацэньваць прафесійнае журы — акцёры, тэатральныя крытыкі, навуковыя дзеячы і мастацтвазнаўцы. Пераможцаў вызначаць у наступных намінацыях: "За лепшае мастацкае выкананне", "За лепшае афармленне батлеечнай Скрыні", "За лепшае раскрыццё духоўна-маральнага зместу спектакля", "За лепшае арыгінальнае рашэнне" і інш. Акрамя конкурсных паказаў у рамках фестывалю будуць арганізаваны тэматычныя круглыя сталы, майстар-класы, выставы і творчыя сустрэчы. Да пачатку фестывалю стартавала дабрачынная акцыя "Святло душы — дабрачыннасць". Батлеечныя калектывы ўжо выступаюць у медыцынскіх установах, інтэрнатах і адукацыйных цэнтрах.
Фэст пройдзе ў перыяд c 12 да 15 студзеня 2017 г. пры адукацыйным цэнтры Свята-Лізавецінскага манастыра ў г. Мінску па адрасе вул. Выгоцкага, д. 5.
