Рыга — адзін з папулярных кірункаў у беларускіх турыстаў на зімовыя святы: адносна нядорага, а эмоцый ад "еўрапейскай прыгажосці" мора. Каляднае ўбранне рыжскіх вуліц лаканічнае, але з густам, а мясцовыя кірмашы зазываюць музыкай, атмасферай "як у кіно" і прыгатаванай тут жа ежай.
Пернікі, глінтвейн, міндаль у заправе, крывяная каўбаса, смажаная капуста — гэта і многае іншае даступна з раніцы да вечара на калядным кірмашы на плошчы каля Домскага сабора. Кошты, вядома, вышэй мінскіх, але некаторыя стравы таго каштуюць. Футравыя шапкі, вырабы з дрэва — для тых, хто прыйшоў за сувенірамі. Жывая музыка з папулярнымі каляднымі хітамі робіць кірмаш выдатным месцам для адпачынку на пару гадзін.
"Тут усё па-хатняму, атмасфера іншая, чым у Мінску, больш калядная. Людзі адчуваюць сябе тут вальней", — распавялі Sputnik Любоў і Ірына Рабушка, мама і дачка, якія прыехалі ў Рыгу з Беларусі на выходныя.
Каля іншага кірмашу вандроўцы натыкнуліся на іншую славутасць — "Каралеўства трусоў". Звяркі бегаюць па міні-парку, кормяцца з рук мінакоў і не баяцца холаду, пра што сведчыць адпаведны надпіс.
