МІНСК, 3 сту — Sputnik. Нацыянальны гістарычны музей Рэспублікі Беларусь збірае "Каробку Дабра" для Цэнтра дзіцячай анкалогіі, гематалогіі і імуналогіі ў Бараўлянах.
"Дарагое лячэнне часта не пакідае сем'ям сродкаў на маленькія радасці. Мы хочам разам з Вамі, нашымі наведвальнікамі, даць магчымасць дзецям, якія доўгі час знаходзяцца ў бальніцы, адчуць святочны настрой і атрымаць падарункі. Акцыя будзе працягвацца да 9 студзеня!", — напісана на афіцыйнай старонцы музея ў "Facebook".
Валанцёры Цэнтра бачаць змесціва "Каробкі Дабра" прыблізна так:
- Блакноцікі, альбомы для малявання, размалёўкі, дзіцячыя кніжкі;
- Цацкі мяккія (новыя);
- Наборы для дзіцячай творчасці, пластылін, гелевыя ручкі,
- Клей з бліскаўкамі, фламастэры;
- Бірулькі, бранзалеткі, мыльныя бурбалкі;
- Рукавіцы, шкарпэткі (новыя).
