МІНСК, 11 сту — Sputnik. У вайсковай часці 3214 унутраных войскаў МУС Беларусі, дзе ў мінулым годзе памерла легендарная рысь — сімвал часці, чакаюць, што будзе атрыманы дазвол на адлоў двух рысяў ў Налібоцкай пушчы, паведаміў Sputnik начальнік аддзялення ідэалагічнай работы часці маёр Аляксандр Бражыцкі.
Рысь, якая жыла на тэрыторыі вайсковай часці 3214, памерла ўвосень 2016 года, жывёла больш за 15 гадоў была жывым сімвалам міліцэйскага спецназа. Як раней распавялі Sputnik, у драпежніка не вытрымала сэрца ад тугі па памерламу сябру.
"Мы разлічваем на тое, што будзе атрыманы дазвол на адлоў двух асобін рысяў ў Налібоцкай пушчы. Хацелася, каб гэта былі самец і самка", — паведаміў Бражыцкі.
Паводле яго слоў, дамоўленасці па гэтым пытанні дасягнуты, але пра тэрміны, калі драпежнікаў пачнуць лавіць, гаварыць яшчэ рана.
Бражыцкі растлумачыў, што вальер для драпежнікаў яшчэ не адрамантаваны. "Мы вырашылі правесці поўную рэканструкцыю старой клеткі, у якой нашы рысі пражылі 15 гадоў. Зараз будаўнічыя работы ў самым разгары, і калі будзе гатовая клетка, складана сказаць. Адшукваем сродкі. Ужо прынята рашэнне, што падлога ў ёй будзе бетоннай", — сказаў суразмоўца агенцтва.
Як раней паведамляў Sputnik, пару рысяў часці ў пачатку 2000-х падарылі расійскія калегі. Рысь-самец апошнія два гады жыцця моцна хварэў, у яго быў радыкуліт, таму ён кульгаў. Жывёла памерла ў пачатку 2016 года ва ўзросце 16 гадоў. Самка рысі пасля смерці свайго сябра пражыла нядоўга — менш за год.
Рысь занесена ў Чырвоную кнігу Беларусі, у краіне жыве не больш за 500 гэтых жывёл, а ў Белавежскай пушчы — не больш за 20. Рысь з'яўляецца жывым сімвалам спецназа ўнутраных войскаў МУС, галава гэтай жывёлы намаляваная на шаўроне байцоў спецназа.
