МІНСК, 20 сту — Sputnik. Футбольны сезон-2017 стартуе ў Беларусі 11 сакавіка матчам за Суперкубак краіны, паведамілі Sputnik у прэс-службе Асацыяцыі "Беларуская федэрацыя футбола" (АБФФ).
У пятніцу ў Доме футбола адбылося пасяджэнне Выканаўчага камітэта АБФФ, на якім быў зацверджаны каляндар будучага сезона, а таксама зацверджаны ліміт на легіянераў.
Старт чарговага футбольнага сезона запланаваны на 11 сакавіка — адбудзецца паядынак паміж чэмпіёнам краіны барысаўскім БАТЭ і ўладальнікам Кубка "Тарпеда-БелАЗам" (Жодзіна). Каманды пазмагаюцца за Суперкубак. У мінулым годзе сезон адкрывалі барысаўчане і салігорскі "Шахцёр". Чэмпіянат Беларусі стартуе 1 красавіка і будзе доўжыцца да 26 лістапада.
Акрамя таго, на Выканкаме была зацверджана сума заявачнага ўзносу: для клубаў (каманд) "вышкі" ён складзе 41200 беларускіх рублёў, для Першай лігі — 9500 беларускіх рублёў, Другой лігі — 2000 беларуская рублёў.
"Ратацыя клубаў паміж Вышэйшай і Першай лігай па выніках сезона-2017 застанецца ранейшай (каманды, якія занялі 15 і 16 месцы ў Вышэйшай лізе, пакідаюць элітны дывізіён, 1 і 2 месцы ў Першай лізе атрымаюць права згуляць у Вышэйшай лізе ў наступным сезоне), а дзве самыя моцныя каманды Другой лігі зменяць дзве горшыя каманды Першай лігі", — дадалі ў АБФФ.
Прапанову Савета клубаў вышэйшай лігі павялічыць ліміт да пяці легіянераў на поле і не абмяжоўваць іх колькасць у заяўцы на гульню было ўхвалена.
Дэпартамент па маркетынгу АБФФ прапанаваў паказваць усе матчы чэмпіянату Беларусі ў інтэрнэце ў фармаце HD. Гэтае пытанне выканкам перадаў на абмеркаванне Савета клубаў вышэйшай лігі. У выпадку ўхвалення будзе падрыхтаваны спецыяльны бізнес-план аб стварэнні ТАА для арганізацыі ТБ-трансляцый матчаў чэмпіянату Беларусі па футболе.
