МІНСК, 22 сту — Sputnik, Ларыса Мятлеўская. У Літаратурным музеі Максіма Багдановіча адбылася творчая вечарына паэтэсы Кацярыны Мяшковай, падчас якой была прэзентавана новая кніга вершаў і прозы "Чароўная хваля вандровак".
Мерапрыемства апекавалася Дзяржаўным музеем гісторыі беларускай літаратуры.
Новая кніга пісьменніцы Кацярыны Мяшковай "Чароўная хваля вандровак" выклікала цікавасць у чытацкім свеце, бо змест кнігі сапраўды мае дзівосную прыцягальную здольнасць і сілу ўзняць чытача і накіраваць у цікавае падарожжа.
У прэзентацыі бралі ўдзел паэт Яўген Гучок, Вячаслаў Корбут, Інга Вінарская, Алесь Марачкін, Ала Доўгая, Серж Мінскевіч і іншыя.
Гэта не першая кніга аўтаркі, у якую сабраны вельмі глыбокія філасофскія творы паэтэсы. А сама вечарына ў хаце Максіма Багдановіча адбылася вельмі цёплай.
Дарэчы, Кацярына Мяшкова развенчвае міф аб тым, што беларускамоўны паэт — пераважна выхадзец з вёскі. Кацярына нарадзілася ў сям'і пасла і мадэльера і заўсёды жыла ў горадзе.
