МІНСК, 24 сту — Sputnik. Гісторык Вячаслаў Швед пачаў збор сродкаў на выданне кнігі "Рэквіем паўстанцам 1863-1864 гг. (Гродзенская губерня)" на платформе Talaka.
Аўтары выдання тлумачаць, што кніга аб'емам 380 старонак прысвечана студзенскім паўстанцам Гродзенскага паўстанцкага ваяводства, якое ўключала ў сябе сённяшнія Гродзеншчыну, Брэстчыну, Беласточчыну.
Асобныя нарысы ў кнізе апавядаюць пра:
- удзельнікаў маніфестацыйнага перыяду 1861 — 1862 гг., распаўсюджвальнікаў газеты "Мужыцкая праўда";
- сяброў падпольнай гродзенскай рэвалюцыйна-дэмакратычнай арганізацыі;
- камандзіраў партызанскага руху і гродзенскіх паўстанцаў-гімназістаў, памочнікаў паўстанцаў;
- дэпартаваных са спаленых шляхецкіх ваколіц і вёсак.
У кнізе таксама прыводзяцца спісы партызанскіх атрадаў і страчаных паўстанцаў.
Асобныя нарысы прысвечаны Кастусю Каліноўскаму ("чырвонаму") і Віктару Старжынскаму ("беламу").
На асобнай мапе будуць пазначаны месцы, звязаныя з паўстанцамі.
