МІНСК, 25 сту — Sputnik. Халоднае паветра са Скандынавіі ўжо пачало паступаць у Беларусь, з-за ветру тэмпература будзе адчувацца на 6-8 градусаў ніжэйшая за рэальную, паведаміў Sputnik у сераду начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Дзмітрый Рабаў.
З-за паніжэння тэмпературы сіноптыкі абвясцілі па краіне аранжавы ўзровень небяспекі, аднак, як чакаецца, пахаладанне будзе непрацяглым. "Абвал холаду ўжо пачаўся — са Скандынавіі надыходзіць ачаг высокага ціску, фарміруючы паўночна-ўсходнія патокі. У метэаралогіі гэта называецца ультрапалярным уварваннем, і сутыкаемся мы з ім ужо другі раз за студзень, але яно будзе слабейшым, чым каляднае.
Але пры моцным паўночна-ўсходнім ветры тэмпература будзе адчувацца яшчэ на 6-8°С ніжэй за рэальную", — сказаў Рабаў.
Паводле яго слоў, на паўднёвым захадзе краіны ў сераду будзе яшчэ не халодна — ад 0 да —5°С, у Мінску ж і на астатняй тэрыторыі рэспублікі ў другой палове дня тэмпература панізіцца да —11°С.
"Кульмінацыя пахаладання прыйдзецца на чацвер: ноччу — ад —11 да —17°С, па паўночным усходзе да —23°С, днём — ад —3°С па поўначы да —11°С па паўднёвым усходзе краіны", — удакладніў сіноптык.
Паводле інфармацыі Рабава, ужо ў пятніцу надвор'е зменіцца — пойдзе снег і пацяплее: днём чакаецца ад —4 да +2°С.
