У найбліжэйшыя суткі ў Беларусі чакаецца ўзмацненне маразоў, папярэдзіў на радыё Sputnik Беларусь начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролі радыёактыўнага забруджвання і маніторынгу навакольнага асяроддзя Дзмітрый Рабаў.
"Тэмпература паветра на бліжэйшую ноч чакаецца —18..-24°С, а ў паўночна-ўсходніх раёнах Віцебскай і Магілёўскай абласцей —25..-28 градусаў, менавіта там і выпісана штармавое папярэджанне", — паведаміў Рабаў.
Па словах сіноптыка, па паўднёвым захадзе нашай краіны будзе крыху цяплей, там больш аблокаў і надвор'е будзе вызначаць атмасферны фронт. Менавіта там чакаецца снег і слабая завея. Тэмпература паветра днём па краіне складзе —9..-15 градусаў.
"У чацвер марознае надвор'е захаваецца. Тэмпература паветра ўначы —9..-16°С. Па-ранейшаму будзе халадней па паўночным усходзе нашай краіны. У Віцебску і Магілёве ў начны час —17..-24°С, пры праясненнях —25..-28°С, і максімальна ўдзень —14°С, а па паўночным усходзе да —16°С. Пры гэтым паўночны вецер будзе ўзмацняць адчуванне марознага надвор'я", — дадаў сіноптык.
Дзмітрый Рабаў удакладніў, што з пятніцы маразы ў краіне пачнуць слабець. У ноч на пятніцу чакаецца —11..-18°С, пры праясненнях —23°С, а ў паўднёва-заходніх рэгіёнах —9°С. Дзённая тэмпература па краіне складзе ад —5°С па паўднёвым захадзе да —12°С па паўночным усходзе.
"Для тых, хто плануе выезды на прыроду, у бліжэйшыя выходныя дні надвор'е будзе даволі спрыяльнае, з зімовым сонцам. Уначы —7..-14°С. Максімальная тэмпература —2..-9 градусаў у сярэднім па краіне", — сказаў Рабаў.
Таксама, па словах сіноптыка, у гэтым годзе ранняй вясны ў Беларусі чакаць не даводзіцца. Сакавік будзе з даволі няўстойлівым надвор'ем.
Лютаўскі прагноз надвор'я ад начальніка службы гідраметэапрагнозаў Рэспубліканскага гідраметэацэнтра Дзмітрыя Рабава слухайце на радыё Sputnik Беларусь.
