МІНСК, 15 лют — Sputnik. У палацы Румянцавых і Паскевічаў 14 лютага адбылася прэзентацыя выставы антыкварыяту са збору калекцыянера Сяргея Пуцілина і фондаў музея, прымеркаваная да Дня святога Валянціна.
Як паведамляюць на сайце музея арганізатары, на ёй можна адшукаць не толькі разнастайныя выявы гуллівых залатакудрых Купідонаў, але і сутыкнуцца з праявай сапраўднай захопленасці… да збору прадметаў даўніны.
На выставе экспануецца мноства антыкварных рэчаў: французская мэбля, мастацкі метал, вырабы з фарфору і шкла, гадзіннікі і многае іншае.
Каб не заблукацца ва ўсёй гэтай разнастайнасці, арганізатары выставы прапануюць усім жадаючым стаць удзельнікамі займальнай экскурсіі-квэста.
Адгадаўшы ўсе загадкі ці проста праслухаўшы экскурсавода, вы дакладна даведаецеся, для чаго выкарыстоўваўся ламберны столік, што такое клуазоне, як выглядае гадзіннік-картэль, для чаго быў неабходны партатыўны бар і на што падобныя ножкі-кабрыолі.
