У выходныя надвор'е ў Мінску будзе радаваць: слупкі тэрмометраў паднімуцца вышэй за нуль, а падстаў выйсці з хаты стане яшчэ больш. Спецыяльна для вас — тэматычны агляд Sputnik мерапрыемстваў, якія можна наведаць 18 і 19 лютага.
Драма "Месяцовае святло"
Карціна "Месяцовае святло" — адзін з фаварытаў будучай кінапрэміі "Оскар". Фільм можа скласці канкурэнцыю мюзіклу "Ла-ла Лэнд" у барацьбе за ўзнагароды, і такое стаўленне да драмы цалкам апраўдана: магчыма, гэта адзін з лепшых фільмаў 2016 года.
У цэнтры сюжэту "Месяцовага святла" — гісторыя сталення і любові цёмнаскурага жыхара ЗША. Здавалася б, усё проста, але водгукі на "Месяцовае святло" ў крытыкаў і гледачоў — толькі станоўчыя, таму абавязкова ацаніце стужку, якая на выходных будзе паказвацца ў кінатэатрах SilverScreen або Falcon Club.
Вечарына "Дэфіцыт"
Арганізатары называюць вечарынкі "Дэфіцыт" прызначанымі "для папаўнення дэфіцыту сапраўдных эмоцый". Музыкай і весялосцю тут будуць загадваць Арцём Дорахаў, "Праект Зу Зу" і Пластык. Прыемны бонус — здымкі ад вядомага фатографа Ігара Царукова.
Пачнецца "Дэфіцыт" вечарам з суботы на нядзелю ў бары "ДК" (вуліца Фабрыцыуса, 4). Кошт квітка — 5 рублёў.
Спектакль па кнізе Бахарэвіча
Раман "Шабаны" Альгерда Бахарэвіча выйшаў не так даўно, але паспеў стаць сапраўдным беларускім бэстсэлерам. У пацверджанне поспеху кнігі — пастаноўка ў тэатры імя Янкі Купалы, а такога гонару вартыя не шматлікія аўтары.
Спектакль можна паглядзець у суботу 18 лютага ў Купалаўскім тэатры, пачатак — у 19:00, кошт квітка — ад 12 рублёў.
Grand Bazar
Тут вы зможаце пазнаёміцца з калекцыямі беларускіх мадэльераў, убачыць работы дэкаратараў і мастакоў, адпачыць і добранька павесяліцца. Grand Bazar — не чарговы "модны маркет", а самы сапраўдны базар для актыўных мінчан. Прыемны бонус — фуд-корт з найсмачнейшымі сэндвічамі і марозівам.
Пройдзе Grand Bazar у адкрытай прасторы "Верх" на вуліцы Куйбышава днём у суботу. Уваход на мерапрыемства бясплатны.
PlaStforma Minsk — 2017
Адкрыты форум эксперыментальных пластычных тэатраў "ПлаSтформа Мінск" пройдзе ў сталіцы ўжо ў пяты раз. Робяць яго сапраўдныя гранды беларускіх эксперыментальных тэатраў — Вячаслаў Іназемцаў, Аляксандр Цебенькоў і Іна Асламова. У рамках двухдзённага фестывалю гледачы змогуць пазнаёміцца з пастаноўкамі дзясятка каманд, якія робяць спектаклі ў розных жанрах — ад перфоманса і да танца.
Пройдзе "ПлаSтформа Мінск" у Нацыянальным цэнтры сучасных мастацтваў 18-19 лютага. Кошт уваходу на вечар — 12 рублёў.
Аўтарскі вечар Аляксандра Філіпенкі
Хоць сустрэча расійскага акцёра з прыхільнікамі пройдзе і ў пятніцу, Sputnik вырашыў зрабіць выключэнне дзеля маэстра і ўключыць яго ў афішу выходных.
Творчы вечар "Дэмарш энтузіястаў" абяцае быць вельмі цікавым: народны артыст Расіі будзе чытаць вершы Булата Акуджавы, Уладзіміра Высоцкага, мініяцюры Міхаіла Жванецкага і апавяданні Сяргея Даўлатава.
Сустрэча з Філіпенка пройдзе ў сталічнай КЗ "Мінск" 17 лютага пачатак праграмы — у 19:00.
