Гэта адначасова і той самы склеп, які знаходзіўся на сядзібе Якуба Коласа, і рэканструкцыя гарадскога склепа сярэдзіны ХХ стагоддзя.
У экспазіцыі прадстаўлены лядоўня (першы халадзільнік без электрычнасці), просты цэбар, які, зрэшты, класік двойчы "зарыфмаваў".
У падвальных нішах — сапраўдныя марынады, варэнне, наліўкі. Гэтую "амброзію боскую", так называў пясняр напой у трылогіі "На ростанях", Колас выдатна рыхтаваў. Экспазіцыю суправадзілі рэцэптамі з папулярнай "Кнігі аб здаровай і смачнай ежы" (асобнік 50-х гадоў), разнастайнымі спосабы захоўвання садавіны і гародніны, а вясной турыстаў абяцаюць частаваць бярозавым сокам са Стаўбцоўшчыны, якая 135 год таму падарыла свету Песняра.
Ва ўспамінах сучаснікаў і блізкіх сяброў Якуб Колас заўсёды выглядае руплівым і дбайным гаспадаром, заўзятым грыбніком і рыбаловам.
Да канца жыцця народны паэт давяраў народным прыкметам, клапаціўся аб добрым ураджаі, праводзячы разнастайныя доследы.
Ён сам даглядаў малады сад, які ўласнаручна пасадзіў у сваёй сядзібе, а некаторыя дрэвы захаваліся да гэтага часу.
