Сумесны музычны праект "Народны альбом" быў упершыню прадстаўлены ў 1997 годзе. За мінулыя 20 гадоў і салісты пасталелі, і склад удзельнікаў зведаў сур'ёзныя змены. Але ранейшымі засталіся змест праекта і радасць чакання новай сустрэчы з калегамі і гледачамі.
Рэпетыцыі мінскага канцэрта абноўленага "Народнага альбома" ішлі лёгка і радасна. Пастаянныя ўдзельнікі ўспаміналі словы і мізансцэны, паджартоўваючы адзін з аднаго, а новыя артысты выдатна ўжыліся ў атмасферу.
Апошні канцэрт "Народнага альбому" у Беларусі адбыўся каля дзесяці гадоў таму. У новай версіі ў праекце ўдзельнічаюць знакаміты джазавы гурт Apple Tea, квартэт "Акварэлі", група Pafnuti's Dreams — але склад салістаў застаўся ранейшым: Лявон Вольскі, Зміцер Вайцюшкевіч, Вераніка Круглова, Кася Камоцкая, Аляксандр Памідораў (Крывашэеў).
