У "Аповесці мінулых гадоў" сказана, што 3 сакавіка 1067 года войскі паўднёварускіх князёў спачатку ўзялі штурмам Мінск, а затым адбылася бітва на Нямізе. Беларускія рыцарскія клубы, клубы гістарычнай рэканструкцыі, а таксама музыканты, якія выконвалі сярэдневяковую музыку, прадставілі ў цэнтры горада цікавую шоу-праграму. У ёй яны аб'ядналі вобразы воінаў ад часоў вікінгаў да салдат пачатку ХХ стагоддзя.
Гэтай падзеяй арганізатары адкрываюць цэлы цыкл мерапрыемстваў, прымеркаваных да юбілею сталіцы Беларусі. Гістарычныя рэканструкцыі будуць праходзіць кожную суботу апоўдні. Асаблівымі датамі ў 2017 годзе стануць 4 сакавіка, 3 чэрвеня ("Рыцарства перад Троіцай") і Дзень горада, які будзе традыцыйна адзначацца 9-10 верасня, і ў яго рамках пройдзе фестываль гісторыі і культуры "Мiнск Старажытны".
На плошчы Свабоды гарцавалі конныя рыцары, шпацыравала шляхта, палохалі гараджан сваім брутальным выглядам вікінгі ў шкурах і з сякерамі. Побач можна было набыць сувенірныя і цалкам прыдатныя для выкарыстання ў побыце прадметы.
