ГРОДНА, 6 сак — Sputnik, Вікторыя Салаўёва. Дзяўчынкі не проста скакалі і махалі пампонамі, а паказвалі сапраўдныя спартыўныя нумары практычна алімпійскага віду спорту. У гродзенскім Ліцэі №1 прайшоў абласны этап па чэрлідынгу сярод школьнікаў.
У гэтым годзе выступы юных каманд набылі зусім новы статус. Бо ў канцы студзеня чэрлідынг улучылі ў рэестр відаў спорту нашай краіны, а ў свеце ён ужо атрымаў часовы алімпійскі статус. Таму на спаборніцтвах дзеці звалі сябе не проста групамі падтрымкі, а сапраўднымі спартовымі камандамі, у якіх хутка могуць з'явіцца ўласныя прыхільнікі.
На адборачны тур у Гродна прыехалі прадстаўнікі Ліды, Шчучына, Слоніма, Зэльвы, Гродна і іншых гарадоў вобласці ва ўзросце ад 6 да 17 гадоў. Усяго — 14 каманд.
"Гэта вельмі добры паказчык для вобласці. У Гродне найбольш магутна прадстаўлена Беларуская федэрацыя чэрлідынгу і груп падтрымкі. Першыя спаборніцтвы ў Гродне адбыліся ў 2009 годзе. З тых часоў чэрлідынг пачаў актыўна развівацца як у школах, так і ва ўніверсітэтах горада, у прыватнасці ў Гродзенскім дзяржаўным універсітэце імя Янкі Купалы", — кажа прадстаўнік арганізацыйнага камітэта абласных спаборніцтваў Сяргей Іваноў.
Каманды выступалі ў намінацыях чэрлідынг шоу і фрыстайл пам. У выніку амаль усе першыя месцы занялі прадстаўнікі Ліды — каманды "SkyLineAdults", "SkyLineKids", "SkyLine". Каманда "X-team" сярэдняй школы №2 са Шчучына стала пераможцам намінацыі чэр ва ўзроставай катэгорыі 11 гадоў і маладзей.
Як адзначаюць арганізатары, пераможныя месцы размеркаваліся чакана. Шчучынскія і Лідскія дзеці ў мінулым годзе сталі лепшымі ў краіне, заваяваўшы на рэспубліканскіх спаборніцтвах першае і другое месцы адпаведна.
Пераможцы кожнай узроставай катэгорыі ў пачатку красавіка будуць прадстаўляць Гродна на спаборніцтвах Рэспубліканскай лігі па чэрлідынгу.
