МІНСК, 15 сак — Sputnik. У БДУ запушчаны праект "Cv.bsu.by" — "Рэзюмэ выпускнікоў БДУ". Гэта інтэрнэт-платформа, на якой размешчана база рэзюмэ старшакурснікаў ВНУ, паведамілі Sputnik у прэс-службе Белдзяржуніверсітэта.
Функцыянаванне сайта дазволіць аптымізаваць пошук першага працоўнага месца маладымі спецыялістамі, спрасціць працэс узаемадзеяння "наймальнік — кандыдат" шляхам прадастаўлення працадаўцам дэталёвых дадзеных аб патэнцыйных супрацоўніках.
"Рэсурс складаецца з раздзелаў "Рэзюмэ" і "Дакументы". Першая рубрыка аб'ядноўвае анкеты выпускнікоў факультэтаў і адукацыйных інстытутаў БДУ. Размяшчэнне заявак ажыццяўляецца па жаданні самога студэнта. Скарыстацца паслугамі базы могуць як "бюджэтнікі", так і "платнікі", — распавялі ў БДУ.
Усе анкеты ўтрымліваюць інфармацыю аб атрыманых прафесійных і кампутарных навыках, апісанне навуковай дзейнасці, узроўню валодання замежнымі мовамі, а таксама дадатковую інфармацыю пра захапленні і хобі.
Як адзначылі спецыялісты, навігацыя сэрвісу дазваляе хутка ацаніць дадзеныя прэтэндэнтаў, а таксама зрабіць адбор кандыдатаў з улікам патрабаванняў працадаўцаў, якія могуць запрасіць на сумоўе любога выпускніка шляхам адпраўкі з партала sms і e-mail апавяшчэнняў.
