МІНСК, 15 сак — Sputnik. 17 сакавіка ў Віцебску распачнуцца мерапрыемствы з нагоды 420-годдзя надання гораду Магдэбургскага права.
Як паведамілі ў абласным краязнаўчым музеі, у гарадской Ратушы адбудзецца ўрачыстая прэзентацыя праекта "Магдэбургскі Віцебск", падчас якой наведнікі змогуць не толькі азнаёміцца з планамі ініцыятывы, але і ўпершыню пабачыць выстаўленыя копіі "Прывілея 1597 года" і "Чарцежу месца Віцебск 1664 года" з фондаў Віцебскага абласнога краязнаўчага музея.
"Праект "Магдэбургскі Віцебск" быў распачаты ў 2016 г. з ініцыятывы ўстановы "Віцебск для мяне" і народнага клуба гістарычнай рэканструкцыі "Варгенторн" і накіраваны на папулярызацыю гісторыка-культурнай спадчыны Віцебска і рэалізацыю супольных ініцыятываў у сферы гарадской культуры і адукацыі", — распавялі спецыялісты.
Нагадаем, 17 сакавіка 1597 года кароль і вялікі князь Жыгімонт Ваза надаў Віцебску Магдэбургскае права, якое прадугледжвала права на самакіраванне і ўласны суд, права зямельнай уласнасці і вызваленне ад большай часткі феадальных павіннасцей, што спрыяла эканамічнаму і культурнаму развіццю горада.
