МІНСК, 21 сак — Sputnik. У Брэсце абралі пераможцу конкурса на распрацоўку лагатыпа і слогана, прысвечаных 1000-годдзю горада, паведамілі Sputnik у Брэсцкім гарвыканкаме.
На думку прадстаўнікоў конкурснай камісіі, у якую ўвайшлі мастакі, выкладчыкі школ і ВНУ, архітэктары і іншыя кампетэнтныя спецыялісты, узровень прадстаўленых на адкрыты творчы конкурс работ быў вельмі розным, аднак вызначальнымі пры выбары фіналістаў былі чатыры крытэрыі: арыгінальнасць, лаканічнасць, выразнасць і ўнікальнасць.
Паводле словаў арганізатараў, адбор адбываўся ананімна, журы бачыла толькі эскізы і апісальную частку. У выніку прадстаўнікі камісіі прынялі аднагалоснае рашэнне пры выбары пераможцы. Ім стала брэсцкая мастачка Ганна Радзько. Яе лагатып "Брэст — 1000 год" уяўляе сабой стылізаваны варыянт герба, назву горада і лічбу юбілею.
"За аснову лагатыпа узяты існуючы герб Брэста, які выкарыстоўваўся на гарадскіх пячатках яшчэ з сярэдзіны 16 стагоддзя. Ён лепшым чынам адлюстроўвае дух моцнага горада, вартаўніка мяжы, сведчыць аб адвазе і мужнасці абаронцаў роднага горада. Выбар лука з паднятай уверх стралой — гэта даніна павагі нашых гісторыі і продкаў, стварэнне новых эмацыйных вобразаў на аснове устояных", — гаворыцца ў тэксце апісання лагатыпа.
Нагадаем, конкурс стартаваў 17 кастрычніка мінулага года па ініцыятыве Брэсцкага гарвыканкама. Яго першы этап завяршыўся ў снежні: за 45 дзён паступіла 23 працы.
