МІНСК, 31 сак — Sputnik. Парадак выступленняў удзельнікаў "Еўрабачання-2017" на конкурсе абвешчаны ў пятніцу Еўрапейскім вяшчальным саюзам (EBU).
"Еўрабачанне-2017" адбудзецца ў Кіеве 9-13 траўня. Удзел у конкурсе ў гэтым годзе прымуць 43 краіны.
Арганізатары шоу ў пятніцу абвесцілі парадак выступленняў удзельнікаў у рамках "Еўрабачання". Так, беларускія ўдзельнікі Naviband выступяць у другім паўфінале 11 траўня пад нумарам 15. У адным паўфінале з беларусамі выступіць і расійская канкурсантка Юлія Самойлава — пад трэцім нумарам.
Таксама ў другім паўфінале выступяць Сербія, Аўстрыя, Македонія, Мальта, Румынія, Нідэрланды, Венгрыя, Данія, Ірландыя, Сан Марына, Харватыя, Нарвегія, Швейцарыя, Балгарыя, Літва, Эстонія і Ізраіль.
Парадак выступленняў у фінале "Еўрабачання-2017" вызначыцца пасля двух паўфіналаў. У іх па змаўчанні пройдуць прадстаўнікі Украіны, Вялікабрытаніі, Германіі, Францыі, Іспаніі і Італіі.
