На фотавыставе, якая адкрылася ў сталічнай галерэі "Універсітэт культуры", Елізар'еў прадстаўлены "ўжывую" — малады фатограф падглядваў фрагменты рэпетыцый прафесара акадэміі музыкі з яго вучнямі.
Рэпетыцыя балета — гэта далёка не тое, што мы бачым на сцэне. Танцоўшчыкі ў камбінезонах і спартовых трыко мала падобныя на тых бязважных істот у газавых пачках, пырхаючых па сцэне. Гэта тупат, крыкі, пот — адкрытыя і шчырыя эмоцыі. 17-гадовы дэбютант — студэнт мінскай ВНУ Мікіта Фядосік здолеў убачыць у гэтым сапраўдную музыку.
Менавіта гэтым і прыгожая фотавыстава. Тут усё не пастановачнае — тут неба адлюстроўваецца ў люстэрках рэпетыцыйнай залы, а ўскрыкі балерын і ўдары пуантаў аб падлогу, здаецца, чутны па-сапраўднаму.
У фае перад выставачнымі заламі развешаныя афішы елізар'еўскіх спектакляў — на нямецкай, кітайскай, японскай, англійскай, французскай мовах, калі імя аўтара балетаў і Theatre Bolshoi de Minsk гучала ў многіх краінах без дадатковых тлумачэнняў.
На адкрыцці выставы было вельмі шматлюдна. Павіншаваць народнага артыста СССР Валянціна Елізар'ева прыйшлі многія вядомыя людзі Мінска. Тут і юныя выхаванцы балетнай студыі, якія ўжо ўмеюць перадужаць дзіцячую сарамлівасць і пазіраваць перад шматлікімі камерамі, і прыхільнікі таленту майстра, і артысты балета.
