МІНСК, 4 кра — Sputnik. Снарад часоў Вялікай Айчыннай вайны быў знойдзены на вуліцы ў Баранавічах у 20 метрах ад жылых дамоў, паведамілі Sputnik у прэс-службе МНС Беларусі.
Інфармацыя аб небяспечнай знаходцы на вуліцы Тэльмана раённага цэнтра паступіла ратавальнікам ноччу ў аўторак.
"Каля бардзюрнага каменя на праезнай частцы знаходзіўся прадмет, як мяркуецца, снарад часоў Вялікай Айчыннай вайны, адлегласць да бліжэйшых будынкаў складала 20-25 метраў", — паведамілі ў МНС.
Паводле інфармацыі ведамства, да прыезду групы размініравання ратавальнікі і міліцыя ачапілі месца, рух аўтатранспарту па вуліцы Тэльмана быў абмежаваны.
Сапёры прыбылі на месца здарэння ў 02:19. 76-міліметровы артылерыйскі снарад забралі для далейшага знішчэння.
